Það væri nær að gráta margt annað en fæðingarorlof.

Hvað er í veði ef fæðingar orlofs greiðslur eru lækkaðar?, er það einhver vá?.
Sem fimm barna faðir og fóstri fleiri sem aldrei fékk krónu fæ ég ekki skilið vælið.
Ég hefði haldið að það lægi beint við að fella þennan lúxus niður að fullu meðan verið er að krafla sig uppúr drullupollinum.
Ekki var hikað við að kremja saman kjör eldri borgara og engin þingmaður hefur lýst yfir áhyggjum þess vegna.

Greiðslur í fæðingarorlofi lækkaðar

Athugasemdir

[Linda (IP-tala skráð) 16.12.2009 kl. 11:00]

Enn þú heppinn að hafa getað unnið og fætt og klætt börnin þín, því eflaust varst þú í vinnu og á fínum launum og tókst sameiginlega ábyrgð á þínum börnum á meðan konan var heimavinnandi.

En í dag er tíðarandinn annar. Margar konur sem að fæða börn útivinnandi og tekjutapið of mikið til að geta verið heima með barninu. Þér finnst kannski betra að gera þetta eins og gert er vestanhafs? Konan elur barnið og er svo kominn út á vinnumarkað tveim vikum síðar og krakkinn á barnaheimili?

Spurningin er hvort þú viljir borga fyrir barnaheimilið eða fyrir fæðingarorlof fjölskyldumeðlims?

[Benedikt (IP-tala skráð) 16.12.2009 kl. 11:47]

Sammála Lindu.

Hvernig var það með þig Erling, varstu viðstaddur fæðinguna?

Hafðir þú tækifæri á því að taka þátt í uppeldinu frá byrjun?

Ég á fimm systkini og var mamma að mestu leyti heimavinnandi en pabbi þurfti að strita fyrir fjölskylduna. Í staðinn sá ég hann varla nema stundum um helgar. Hann kom jú heim eftir vinnu, borðaði matinn og svaf yfir fréttunum. En því miður er þetta sú minning sem er sterkust í huga mér. Því miður komst ég ekki að því fyrr en löngu síðar að við faðir minn áttum ýmisleg sameiginleg áhugamál en höfðum aldrei tíma til þess að deila þeim saman. Faðir minn reyndist ágætis karl þegar mér tókst að kynnast honum eftir að ég flutti að heiman.

Ég ætla að gera allt sem ég get til þess að börnin mín muni aldrei þurfa að ganga í gegnum það sama og ég!

Að mínu mati er fæðingarorlfssjóður sterkasta vopnið í baráttunni um jafnrétti kynjanna.

Það að þú skildir ekki njóta þessara réttinda á sínum tíma er auðvitað sorglegt en lýsandi fyrir tíðarandann á þeim tíma.

Þar sem ég á foreldra sem fá fáránlega lágar ellilífeyrisgreiðslur þá skil ég alveg gremju þína varðandi þann þátt. Það að skerða "nánast ekkert" er hreint út sagt fáránlegt!!

[Erling Garðar Jónasson, 16.12.2009 kl. 14:15]

Þakka ykkur Linda og Benedikt, Þessi rök ykkar er öll skynsamleg og halda ef sú stefnumótun sem hún byggir á hefur einhvern vitrænan grunn, m.a. að það eigi að vera lögmál að það þurfi tekjur tveggja til að reka heimilli. Hinsvegar skal undirstrikað að ég hef verið stuðningsmaður jafnréttis kynjanna svo lengi sem ég man eftir.

Þetta er hinsvegar ekki það sem við erum með sem aðalatriði nú, heldur það að það þarf að skera tímabundið niður öll framfara atriði, ásamt með refaveiðum á kostnað ríkisins og fl. og fl. m.a. til að skattabyrðin sligi ekki atvinnulíf og heimilin með en meiri þunga en orðið er.

Því miður er staðan sú að velferðarathafnir þurfa líka að slíðra sitt vopnasafn.

[Benedikt (IP-tala skráð) 16.12.2009 kl. 14:26]

Erling,

það er af nógu að taka í niðurskurði sem manni þætti skynsamlegri.

T.d. af hverju eru allir þessir einstaklingar á listamannalaunum sem þurfa í raun ekki á þeim að halda. T.d. Erro, þingmaðurinn Þráinn Bertelsson o.fl.?

Þráinn reyndar talaði um heiðurslistamannalaunin sem viðurkenningu sambærilega við ólympíuverðlaun eða eitthvað slíkt. Væri bara ekki nær að gefa þessu liði Fálkaorðuna og sleppa öðrum útgjöldum?...

Þá mætti alveg skera verulega niður í utanríkisráðuneytinu, sleppa ESB nefndinni alveg (enda erum við ekkert á leiðinni þangað inn á næstunni). Ég gæti sjálfsagt verið í allan dag að telja upp ruglið sem verið er að henda peningum í í stað þess að lækka ekki lífeyrisgreiðslur til eldri borgara sem og að lækka í þriðja skiptið á einu ári hámarksupphæðina sem maður getur sótt úr fæðingarorlofssjóði.

Eins og staðan er í dag þá er alveg ljóst að mjög mikill hluti þeirra sem voru búnir að gera áætlanir, sem miðuðust við lækkaðar greiðslur úr fæðingarorlofssjóði eins og þær voru kynntar í sumar, munu ekki hafa efni á því að taka orlof :(

[Erling Garðar Jónasson, 16.12.2009 kl. 16:44]

Benedikt, ég tek heilshugar undir þau sjónarmið sem þú setur fram, það er ógrynni af niðurskurðarmöguleikum í fjárlaga tillögunum.

Mín von var sú að þingmenn hefðu kjark til að halda í við menningarsnobb hverskonar, ónauðsynleg gæluverkefni af pólitískum toga, framlögum til þing og stjórnmálaflokka, fjölda eyðsluverkefna ráðuneyta, lækkun launa og kostnaðar hjá þingi og ríkisstjórn svo um munar og margt fleira áður saman væri dregið í velferðarmálum. En svo virðist ekki vera heldur skal fast haldið við skattahækkanir uppá rúma 40 miljarða króna nettó sem bitnar fyrst og síðast á lækkandi atvinnustigi, það er grafalvarlegt því landsframleiðslan þarf að aukast til að við náum að krafla okkur uppúr feigðarfeninu.

[Halla Ómars (IP-tala skráð) 16.12.2009 kl. 18:52]

Ég er sammála því sem Benidikt segir að það að skerða "nánast ekkert" sé fáránlegt og það ekki í fyrsta skipti á árinu, ekki í annað skiptið á árinu heldur í það þriðja. Reynt er eins og hægt er að naga versta kjötið langt inn að beini þó að miklu betra kjöt sé ekki langt undan.

 Því miður leikur gæfan ekki við alla eins og hún hefur leikið við þig og annað fólk sem hafði tök á því á sínum tíma að haga þessu eins og þín fjölskylda hefur gert. Í dag held ég að þetta sé talin undantekning ef þetta er hægt. Í staðin geta feður ekki nýtt sér þann rétt sem loksins komst á til að kynnast barni sínu til jafns við móðurina á fyrstu mánuðum barnsins, þeir hverfa aftur til gamla tímans og vinna til að eiga í sig og á fyrir fjölskyldu sinni því tekjutapið er svo mikið og alltaf lækkar hámarksgreiðslan.

 Ég vil líka minnast á það að þetta er ekki gert með miklum fyrirvara heldur er fólki strax hent út í djúpu laugina. Ég skil alveg að það verði að skera niður allsstaðar og mótmæli því ekki en mér finnst helvíti skítt að vera komin nokkra mánuði á leið þegar enn eitt stökkið er í umræðunni og vera búin að skipuleggja fæðingarorlof. Það mætti í framtíðinni huga aðeins að t.d öryrkjum, ellilífeyrisþegum ofl og framkvæma svona breytingar á aðeins lengri tíma svo fallið verði ekki alveg eins hátt.

[Erling Garðar Jónasson, 16.12.2009 kl. 22:01]

Þakka þér Halla fyrir að taka þátt í skoðanaskiptum okkar. Ég verð vegna aldurs að gera fyrir því grein að ég fékk að kynnast ykkar hlið mála því á mínum fimm ára námstíma í Kaupmannahöfn áttum við hjón tvo syni sem voru í gæslu meðan konan mín var í vinnu til að kosta heimilishaldið og ég í skóla.

Það var hinsvegar mikið gæfuspor fyrir okkur hjón að starfa á landsbyggðinni í mikilli nánd við heimilið og börnin.

Góðar óskir með meðgönguna og framtíðina